Xitoy avtomobillardagi yashirin tutqichlarni taqiqlashga tayyorgarlik ko‘rmoqda
2027-yil boshidan avtomobil ishlab chiqaruvchilar yashirin va avtomatik tizimlardan voz kechishlari shart, buning sababi dizaynda emas.
Muhokamalar 2025-yilda bir qator yo‘l-transport hodisalaridan so‘ng boshlandi, chunki yashirin tutqichli modellarning eshiklari ochilmay qolgan. Ayrim favqulodda vaziyatlarda YTHdan keyin elektronika ishdan chiqqan va jabrlanganlarni qutqarish qiyinlashgan.
Avariya paytida bunday tutqichlar faqat 67% hollarda ochildi, oddiy mexanik tutqichlar esa ancha kamroq muammoga sabab bo‘ldi. Haydovchi yoki yo‘lovchilar tashqariga chiqa olmay, tutqichlar yashirinib qolgani va eshiklar qulflangani sababli halok bo‘lgan fojiali holatlar ham qayd etilgan.
Shuningdek, qishda mexanizmlar ko‘pincha muzlab, ishlamay qolishidan ko‘plab haydovchilar shikoyat qilmoqda.
Endi Xitoydagi avtomobil ishlab chiqaruvchilar an’anaviy usulga qaytishlari zarur: tutqich oddiy, ko‘zga yaqqol ko‘rinadigan va elektron tizimlar butunlay o‘chirilganda ham ishlashi kerak. Bu talab avtomobilning ham tashqi, ham ichki qismiga taalluqli.
Aslida, Xitoy o‘nlab yillar davomida ishonchliligini isbotlagan avtomobil yechimlarini bozorga qaytarmoqda. Tesla va Xitoyning premium brendlari tufayli urf bo‘lgan zamonaviy elementlar yaqin kelajakda odamlar xavfsizligi uchun taqiqlanadi.
Hozirda ishlab chiqarilgan va yo‘llarda harakatlanayotgan modellar, tabiiyki, taqiqlanmaydi, jumladan XXR tashqarisida ham. Avtoelon.uz salon ichidan mashinadan favqulodda chiqish uchun avariya tutqichlarini topish maqsadida avtomobil egalariga foydalanish yo‘riqnomasini sinchiklab o‘rganishni tavsiya etadi. Ko‘pincha bu tutqichlar eshik panellari ichida yashirincha joylashtiriladi va ko‘p egalar ularning mavjudligidan bexabar bo‘ladi.
