O‘zbekistonda VAZ-2106 qancha turadi?

Nol olti “Jiguli" bir vaqtlar O‘zbekiston yo‘llaridagi eng orzu qilingan avtomobillardan biri bo‘lgan.

Bugungi kunda "06" Toshkentning kundalik qatnovidan deyarli yo‘qolib ketgan bo‘lsa-da, ikkilamchi bozorda kuzovi butun arzon mashinalarni ham, bir necha ming dollar turadigan yaxshi parvarishlangan nusxalarni ham topish mumkin.

Mazkur model 1976-yildan 2005-yilgacha ishlab chiqarilgan bo‘lib, jami adadi 4,3 million donadan oshgan. O‘zining uzoq tarixi davomida VAZ-2106 modeliga 1,3, 1,5 va 1,6 litr hajmli benzinli, qatorli 4 silindrli dvigatellar o‘rnatilgan. VAZ-2103 rusumli 1,5 litrli motor bilan jihozlangan talqini eng ommabop hisoblanadi. Ushbu mashinalarning katta qismi karbyuratorli yonilg‘i tizimiga ega bo‘lgan, biroq ko‘plab haydovchilar ularni injektorga moslab qayta jihozlab olishgan. Zavoddan injektorli chiqarilgan "06" ham bo‘lgan, lekin bu ishlab chiqarish yakuniga — 2005-yilga to‘g‘ri kelgani bois ularning soni ko‘p emas.

Bugungi kunda "06" xarid qilayotganda dvigatel xususiyatlari mutlaqo asosiy mezon hisoblanmaydi. O‘tgan bir necha o‘n yillik davomida ko‘plab mashinalar kapital ta’mirlangan, motori, uzatmalar qutisi va boshqa agregatlari almashtirilgan. Shu sababli xaridorlar dastlab kuzov, dvigatel va salon holatiga qaraydi, ishlab chiqarilgan yili hamda ko‘rsatilgan yurgan masofasiga esa keyinroq e’tibor qaratadi.

Ayni paytda Avtoelon.uz saytida sotuvga qo‘yilgan eng qimmat VAZ-2106 avtomobillaridan biri 3700 dollarga baholanmoqda. 3000 dollar atrofida esa egalari dvigatel, salon va tashqi ko‘rinishni yaxshilashga sarmoya kiritgan mashinalarni uchratish mumkin.

Holati ancha-muncha yaxshi, minsa bo‘ladigan mashina uchun esa 2000 dollar atrofida narx so‘rashlari mumkin.

Bu esa bozorning qanchalik o‘zgarganini yaqqol ko‘rsatib turibdi. Taxminan o‘n yil avval xuddi shunday holatdagi VAZ-2106 uchun 5000 dan 7000 dollargacha narx aytilishi mumkin edi. O‘sha paytlarda avtomobillar tanlovi umuman olganda kam bo‘lgani sababli "Jiguli" ancha xaridorgir va likvid mashina sanalardi.

Bozorning boshqa qutbida esa nochor holatdagi yoki qayta tiklash talab etiladigan mashinalar joy olgan. O‘zbekistondagi eng arzon variantlar 400 dollargacha turadi. Ammo bunday vaziyatda xarid narxi — bu xarajatlarning faqatgina boshlanishi: mashina kuzov ta’miri, dvigatelga xizmat ko‘rsatish, osma qism, elektr tizimi va salonni qayta tiklashni talab qilishi mumkin.

Bunga sabab faqat avtomobilning eskirgani emas. So‘nggi o‘n yil ichida O‘zbekiston avtomobil bozori tubdan o‘zgardi. Modellar tanlovi ancha kengaydi, hamyonbop Xitoy brendlari, shuningdek, yangi toifadagi — gibrid va elektromobillar paydo bo‘ldi. Ilgari eski "klassika"ni har kungi oddiy transport vositasi sifatida ko‘rgan xaridor uchun bugungi kunda hatto kam byudjet bilan ham muqobil variantlar talaygina.

Eski avtomobillar uchun ekologik talablar va cheklovlar haqidagi gap-so‘zlar ham o‘z ta’sirini ko‘rsatdi. Ayrim egalar uchun bu hali talab borligida mashinani arzonroq narxda bo‘lsa ham sotib yuborishga qo‘shimcha sabab bo‘ldi.

Oqibatda VAZ-2106 oddiy qatnov vositasidan asta-sekin ishqibozlar avtomobiliga aylanib bormoqda. Yaxshi saqlangan nusxalarni endi har kuni minish uchun emas, balki qayta tiklash, tyuning qilish yoki kolleksiya uchun sotib olishyapti. Natijada saranjom "shoxa"lar shunchaki mashina emas, balki o‘tgan davrni yodga soluvchi noyob eksponatlarga aylanmoqda.

Aytgancha, Avtoelon.uz jamoasi o‘z YouTube kanalida "Jiguli"ning aynan ushbu modeliga bag‘ishlangan video chiqargan. Tomosha qiling!