Yonayotgan Lacetti. UzAutoga qarshi ish qanday yakunlandi?
Yong‘in xavfi tufayli sedanlar partiyasini zudlik bilan qaytarib olish buyurildi.
Iste’molchilar huquqlarini himoya qilish qo‘mitasi yong‘in xavfi tufayli 2023 yilda ishlab chiqarilgan L-Style MT komplektatsiyasidagi Chevrolet Lacetti avtomobillari partiyasini zudlik bilan qaytarib olishni talab qildi.
Bunga Qoraqalpog‘iston fuqarosining davlat idoralariga murojaati sabab bo‘lgan, uning mashinasi xarid qilinganidan besh oy o‘tib yonib ketgan. Xuddi shunday holat Navoiy viloyatida ham qayd etilgan.
UzAuto Motors jabrlanuvchining transport vositasi bilan bir davrda ishlab chiqarilgan yana 37 ta avtomobilni qaytarib olish majburiyatini oldi. Barcha avtomobillar Chevrolet rasmiy servislarida texnik ko‘rikdan o‘tishi kerak. Yong‘inga nima sabab bo‘lgani hozircha rasman ma’lum qilinmagan.
Jabrlangan haydovchiga yangi Chevrolet avtomobili taqdim etildi, shuningdek, har bir kechikish kuni uchun transport vositasi qiymatining 1 foizi miqdorida tovon puli to‘lab berildi.
Ishlab chiqarishdagi brak butun dunyoda sodir bo‘ladi va har bir bunday holatda ishlab chiqaruvchilar ular uchun javobgardirlar, qaytarib olish ishlari o‘tkazadilar. Shov-shuvli holatlarda avtomobilsozlik tarixida Toyota, Volkswagen va hatto Tesla ham bor. Bu holatda yuzlab yoki minglab emas, balki millionlab avtomobillarni qaytarishadi. Ilgari O‘zbekistonda bu kabi holatlar omma oldida e’lon qilinmagandi. O‘zbekiston avtomobil egalari muammolarni mustaqil hal qilishgan yoki nuqsonlarni bartaraf etish uchun kafolat (garantiya) xizmatiga murojaat qilishgan.
